विनयी त्रिवेणी गाउँपालिकाको प्रशासनिक भवनलाई जग्गा उपलब्ध गराउने मन्त्रीपरिषद्को निर्णय

नेपाल सेरोफेरो

2024-07-30

तिर्थराज डुम्रे
नवलपुर । नवलपरासी पूर्व नवलपुरको विनयी त्रिवेणी गाउँपालिकाको प्रशासनिक भवन निर्माणका लागि नेपाल सरकार मन्त्रीपरिषद् बैठकले ६ रोपनी जग्गाको भोगाधिकार दिने निर्णय गरेको छ ।
मन्त्रीपरिषद्को सोमबार बसेको बैठकले विनयी त्रिवेणी गाउँपालिका वडा नं. २ मा रहेको ६ रोपनी राष्ट्रिय वनको जग्गा प्रयोग गर्न दिने निर्णय गरेको हो । हाल गाउँपालिका भवन रहेको स्थानभन्दा उत्तर तर्फ पूर्वपश्चिम राजमार्गसंग जोडिएको स्थानमा ६ रोपनी जग्गा भोगाधिकारको लागि प्राप्ती भएको गाउँपालिका अध्यक्ष घनश्याम गिरीले बताउनुभयो ।
राजमार्ग भन्दा उत्तर तर्फ रहेको उक्त स्थानमा भवन निर्माणका लागि गाउँपालिकाले दुई वर्ष अगाडीबाट पहल शुरु गरेको थियो । जग्गा प्राप्ती भएसंगै अब त्यहाँ रहको रुखहरुको हटाउने र प्रशासनिक भवन निर्माणको लागि आवश्यक तयारी गर्ने काम शुरु गर्ने तयारीमा गाउँपालिका रहेको अध्यक्ष गिरीले बताउनुभयो ।
हाल विनयी त्रिवेणी गाउँपालिकाको कार्यालय रहेको स्थान साँधुरो हुदाँ कार्यालय व्यवस्थापपन र प्रशानिक कार्य सम्पादनमा समेत असहजता हुदै आएको छ । हाल गाउँपालिकाको कार्यालय परिषरसंगै वडा नं. २ को वडा कार्यालय समेत रहेको छ ।
गाउँपालिकाले नयाँ प्रशासनिक भवन निर्माण पूर्व लागि आवश्यक प्राविधिक कार्यहरु गरिसकेको छ । गाउँपालिकाको प्रशासनिक भवन सहित कार्यालय परिषरको नक्सांकन निर्माण भई सकेको छ । सोही अनुसार अब प्रशासनिक भवन निर्माणको काम शुरु हुनेछ ।
गण्डकी प्रदेशको भारतसंग सिमानाका जोडिएको एक मात्रै स्थानीय तहको रुपमा रहेको यस गाउँपालिकाले दुम्कीबास त्रिवेणी सडक निर्माण, आधारभूत स्वास्थ्य चौकी निर्माणको लागि जग्गा प्राप्ती लगायतको कामलाई प्राथमिकतामा राखेर काम अगाडी बढाएको गाउँपालिका अध्यक्ष गिरीले बताउनुभयो ।