एमाले विनयी त्रिवेणीको प्रशिक्षण सम्पन्न

नेपाल सेरोफेरो

2024-02-07

तिर्थराज डुम्रे
दुम्कीबास । नेकपा एमाले विनयी त्रिवेणी गाउँपालिका कमिटीको आयोजनामा बुधबार पार्टी कार्यालयमा पालिका स्तरीय प्रशिक्षण भएको छ । पालिका भित्रका पार्टी जिल्ला कमिटी, पालिका कमिटी र वडा कमिटीका पदाधिकारीहरुलाई गाउँपालिका कमिटीले प्रशिक्षण राखेको हो ।
प्रशिक्षण कार्यक्रममा नेतृत्व, पार्टी निर्माण सञ्चालन र ब्यवस्थापनको बारेमा पार्टी जिल्ला अध्यक्ष मुक्तिराम पाण्डेले प्रशिक्षण दिनुभयो । पार्टीको दशौं महाधिवेशनद्वारा पारित सिद्धान्त नीति कार्यक्रम र कार्यदिशा तथा आगामी कार्यभारबारे पार्टी केन्द्रीय सदस्य तिलक महत, पार्टी र जनप्रतिनिधिहरुको सम्बन्ध, समाजबादको आधार निर्माण योजनाबारे केन्द्रीय सदस्य रविन्द्र अधिकारी र राजनितिक दलहरुको तुलानात्मक अध्ययनबारे एमाले पोलिटब्यूरो सदस्य एवम् नवलपुर इञ्चार्ज मना जि.सी.ले प्रशिक्षण प्रदान गर्नु भएको थियो । प्रशिक्षण कार्यक्रममा एमाले केन्द्रीय सल्लाहाकार परिषद् सदस्य चन्द्रमणी खरालले पार्टीको विविध पक्षहरुबारे जानकारी गराउनु भएको थियो ।
प्रशिक्षणमा सहभागी पार्टीका विभिन्न जिम्मेवारीमा रहेका पदाधिकारीहरुलाई पार्टीको हित र पार्टीको संगठन बिस्तार अभियानमा लाग्न नेतृत्वहरुले प्रशिक्षित गर्नु भएको थियो ।
प्रशिक्षण कार्यक्रममा बोल्दै पार्टी विनयी त्रिवेणी गाउँपालिका कमिटी अध्यक्ष एवम् गाउँपालिका अध्यक्ष घनश्याम गिरीले पार्टीको नीति र जनता प्रत्यक्ष लाभाम्वीत हुनेगरी गाउँपालिकाबाट सेवाप्रवाह भइरहेको बताउनुभयो । उहाँले पार्टीबाट प्राप्त सुझावहरुको कार्यान्वयन र जनमुखी कार्यक्रम निर्माण गरी समृद्ध विनयी त्रिवेणी निर्माणको आधारशिला निर्माण भएको उल्लेख गर्नुभयो ।
कार्यक्रमा नेकपा एमालेका विभिन्न कमिटीका सदस्यहरुको उल्लेखनीय उपस्थिति रहेको थियो । कार्यक्रममा संविधान सभा सदस्य एवम् एमाले नेता जिवन श्रेष्ठ, एमाले गण्डकी प्रदेश सदस्य एवम् क्षेत्र नं. २ इञ्चार्ज भिमलाल अधिकारी, क्षेत्र नं. २ (ख) इञ्चार्ज कृष्ण बि.क. लगायतको उपस्थिति रहेको थियो । प्रशिक्षण कार्यक्रममा करिव दुई सय पार्टी कमिटी सदस्यहरुको उपस्थिति रहेको थियो ।