विद्यार्थी कल्याणकारी कोषमा एक लाख ५० हजारको अक्षयकोष स्थापना

नेपाल सेरोफेरो

2023-11-04

नवलपुर । नवलरासी पूर्वको मध्यविन्दु नगरपालिका – १० का स्व. शेर बहादुर विश्वकर्मा (कालिराज) को स्मृतिमा मध्यविन्दु–१२ को सरस्वती नमूना आधारभूत विद्यालयमा एक लाख ५० हजार रुपैयाको अक्षयकोष स्थापना भएको छ ।
स्व. शेर बहादुर विश्वकर्माको मृत्यु भएको ११ दिनको दिन उहाँको परिवारले विद्यालयमा स्थापना भएको विद्यार्थी कल्याणकारी अक्षयकोषमा रकम हस्तान्तरण गर्नु भएको हो । शनिबार उहाँको घरमा आयोजित श्रद्धाञ्जली सभामा स्व. शेर बहादुर विश्वकर्मा (कालिराज) को स्मृतिमा श्रीमती पार्वती बिश्वकर्मा, छोराहरु राम प्रसाद विश्वकर्मा (कालिराज) र प्रकाश विश्वकर्मा (कालिराज) तथा परिवारको सहभागितामा नेपाल बैंक लि. मा रहेको विद्यालयको अक्षयकोष खातामा क्युआर कोड मार्फत नगद एक लाख ५० हजार रुपैयाँ जम्मा गरिदिनु भएको हो । उक्त कार्यक्रममा परिवारको तर्फबाट छोरा राम प्रसाद विश्वकर्मा (कालिराज) ले वुवाले यस क्षेत्रमा गर्नुभएको योगदानलाई निरन्तरता दिदै वहाँको सम्झनामा अतिविपन्न जहेन्दार बालबालिकाहरुका लागि अक्षय कोषको रकम हस्तान्तरण गरिएको बताउनु भयो ।
शनिबार भएको श्रद्धान्जली सभा तथा अक्षयकोष स्थापना कार्यक्रममा प्रमुख अतिथि रहनु भएका सुनचाँदी व्यवसायी संघ चितवनका अध्यक्ष डा. यम बहादुर विश्वकर्माले स्व. शेर बहादुर विश्वकर्माले आफ्नो जिवनमा गर्नु भएको सामाजिक कार्यको निरन्तरताको रुपमा परिवारले स्थापना गरेको अक्षयकोषको प्रशंसा गर्नुभयो । श्रद्धान्जली सभा तथा अक्षयकोष हस्तान्तरण कार्यक्रममा विद्यालय व्यवस्थापन समितिका अध्यक्ष भुपलाल अर्याल र प्रधानाध्यापक जनकराज पोख्रेलले विद्यालयको तर्फबाट श्रद्धाञ्जली पत्र हस्तान्तरण गर्दै स्व. शेर बहादुर विश्वकर्मा (कालिराज) को परिवारबाट विद्यालयलाई निरन्तर गरिएको सहयोगले अति विपन्न र जेहेन्दार बालबालिकाको शैक्षिक उन्ननयनमा महत्वपूर्ण भुमिका खेलेको कुरा प्रष्ट पार्नुका साथै हाल सम्मकै सबैभन्दा ठुलो राशीबाट अक्षयकोष स्थापना गर्नुभएकोमा श्रीमती पार्वती बिश्वकर्मा, छोराहरु राम प्रसाद विश्वकर्मा (कालिराज), प्रकाश विश्वकर्मा (कालिराज) र परिवारजनलाई हार्दिक धन्यवाद दिनुभएको थियो ।
संयुक्त दलित समाज, मध्यविन्दु १० ले आयोजना गरेको श्रद्धान्जली सभा कार्यक्रममा विभिन्न सामाजिक व्यक्तित्वहरुको सहभागिता रहेको थियो । सो क्रममा उहाँहरुले स्व. शेर बहादुर विश्वकर्माले सामाजिक क्षेत्रमा खेल्नु भएको भूमिका र त्यसैको निरन्तरताको रुपमा परिवारले गरेको अक्षयकोष स्थापना कार्य प्रशंसा गर्नु भएको थियो ।